وسيم عليا

رائعة الجمال والحضور، شخصية مستقلة متفردة بفنها ونجوميتها ولاتقارن بأحد، بصمتها خاصة، ممثلة من نجوم الصف الأول الأصيلة “تولين البكري” ولطالما أبدعت خلال هذه السنوات وعلى ما يبدو أنها قوبلت بقلة الأصل، حيث كتبت عبر صفحتها الشخصية على فيسبوك موضوع للنقاش وما من جواب له بحسب تعبيرها:

( قلة الأصل) ليش عم نغذيها بعلاقاتنا الإنسانية!

يعني في ناس بتاكل وبتشرب وبتنام معون على مدار سنين طويلة وبالاخير فجأة الطرف الأول بيحمل سطل مي وبيكب عالأرض كل هالعشرة..وقيسوا هالشي على كل الاصعدة بالعلاقات بالشغل او بحياتك الشخصية مع صديق او حبيب او..او.. مثلآ انا ممثلة بيطلب مني مخرج ما أني وقف معو بعمل ما او ببداياتو وانا بكل محبة بوقف معو وبتنازل عن أجري المادي واسمي بالشارة ومابحط اي شروط بس لكون (كفوة) وبالاخير هالمخرج بينسا او بيتناسا بعد ما ينشهر اني يوما ما كنت أصيلة معو! ومابيتذكر يرجع يجيبني لأي عمل هو فيه بالعكس بيجيب الناس اللي عم يشترطو ويتطلبوا! طيب .. ك زوج أو حبيب بخلصلك وبخدمك من قلبي لسنين طويلة وبس تصير بنيآدم تاني بتجيب نفس السطل يا.  سطل وبتكب مي على هالعشرة وبتروح لعند غيري!

صديقتي..او صديقي…اللي بكون فاتحتلا بيتي وخزانتي وحياتي وبعد عشرة عمر بتخوزقني وبتحكي عليي او بتاخد جوزي!  فنان/ة  قبل ما ينجم وتكبر الخسة براسو يعني بإختصار وقت يكون لسا جوعان وناطر كم مشهد يبين فيون بيكون كتير حباب . وبس يكبر اسمو بينسا كل العالم اللي وقفوا معو بهديك الفترة ودعموه ليصير بهالمكان لأ وبيصير بدو يدمرو ويحكي عليه ويأذيه بكل الطرق!

ليش مننسا المعروف!  طول عمري مثلآ ببارك لزميل أو زميلة اشتغلوا شغل حلو مو بس من سوريا ببارك للكل من وين ماكانوا ..وبالمقابل نادرا لزميل صغير او كبير يباركلي الا ماندر . متل الكبيرة بأسمها منى واصف و وفاء موصلي و روعة ياسين و رانية أحمد وكم اسم تاني  وناس من الشعب ماااابعرفون هنن اللي بيباركولي!!! وبلاقي منون كل المحبة واللطف والإنسانية .

ليش هالكر الصغير اللي جواتنا اللي أسمو قلة الأصل منضل منغذيه ليكبر جواتنا ويصير جحش كبير؟؟؟ مشان شو ؟؟؟ المصاري؟؟؟؟ الشهرة ؟؟؟؟ ماعم يفكروا هدول الناس بالآخرة ؟ مارح تاخد من هدول اي شي معك لما تصير بهالجورة وانت معفن وازرق وريحتك جيفة….الكفن مالو جيوب وكل هالمعارك ((الغير شريفة)) اللي عملتا وانت عايش مارح تستفيد منها بعد مماتك الا بعملك..وسمعتك..ليش لتعيش قليل أصل !!!!!

ماعم بفهم..

#موسى_والحياة”.

ونال الموضوع الإعجاب والرضا من شريحة كبيرة من الناس وانهالت التعليقات المؤيدة للبكري ومن بين التعليقات الفنانة أمل عرفة حيث كتبت:

بدك ما تعلي سقف “توقعاتك من أي حدا بس تعملي هيك ما حدا بيقدر يعملك خيبة بقا.

وأرفقت لها تعليق ثاني: ما حدا بيقدر ينكر موهبتك العالية وشغلك”.

التعليقات

comments